Il traffic da Pasca en direcziun sid cumenza quest onn gia in'emna avant ils dis da festa. Avant il portal dal nord dal tunnel dal Gottard hai la sonda dà colonna da fin a nov kilometers en direcziun sid. Quai ch'ha muntà fin ad 1 ura e mesa dapli temp da viadi en il sid, uschia il TCS. Il TCS ha recumandà da sviar sur l'autostrada A13 e da prender la ruta dal San Bernardino per charrar en il sid.
Emprimas colonnas al Gottard avevi dà gia venderdi suentermezdi. Ina da las raschuns per las colonnas sin las autostradas en direcziun sid è che las vacanzas da Pasca han cumenzà en gist 11 pajais federativs tudestgs, tranter auter en ils pajais federativs vischins da la Svizra Baden-Württemberg e Bayern. En Svizra cumenzan questa fin d'emna las vacanzas en ils dus chantuns Basilea Citad e Basilea Champagna.
Uri prenda mesiras
Sche las colonnas s'augmentan ad otg kilometers sin l'autostrada tras il chantun Uri, vegn la sveltezza maximala reducida tranter Altdorf ed Amsteg sin 80 km/h. La finamira è da ralentar il traffic e da reducir il risico d'accidents. Perquai che las colonnas al Gottard vegnan d'onn tar onn pli lungas ha il chantun Uri lantschà l'onn passà ensemen cun l'Uffizi federal da vias Astra in project che duai gidar a diriger il traffic – in uschenumnà management da traffic.
Punct culminant: mesemna proxima
Las propi lungas colonnas avant il tunnel dal Gottard vegnan entant spetgadas pir mesemna proxima. L'Uffizi federal da vias quinta per il cumenzament dals dis da Pasca ed il cumenzament da bleras vacanzas betg be cun colonnas avant il Gottard, mabain era cun lungas colonnas sin la ruta dal San Bernardino.