Tgi ch'ha vulì charrar en il sid la sonda avantmezdi, ha duvrà pazienza davant il tunnel dal Gottard. Davant il portal nord tranter Amsteg e Göschenen è la colonna stada per part sis kilometers lunga. Il temp da spetga ha muntà a bun in'ura. Pliras uras èn las colonnas lura stadas tranter quatter e sis kilometers lungas. Davent da las quatter è la situaziun sa schluccada svelt.
Tgi che ha vulì guntgir sin la via chantunala tranter Erstfeld e Göschenen, è dentant era restà fitgà en il bler traffic. E cun il cussegl dal TCS da guntgir sur la ruta dal San Bernardino, hai era dà là colonnas sin plirs trajects.
Er colonnas tranter Quinto ed Airolo
Davant il portal sid dal Gottard tranter Quinto ed Airolo è la colonna stada trais kilometers lunga enturn mezdi. Quai correspunda ad in temp da spetga da radund 20 minutas en direcziun nord.
Pervi da la crisa da corona datti questa stad damain traffic sin l'autostrada A2 en direcziun sid. Quai ha confermà la Polizia chantunala dad Uri sin dumonda da l'agentura da novitads Keystone-SDA.
