Anc n'èn betg uschè blers autos electrics da viadi en Svizra. Quai pudess dentant bainbaud sa midar. Tenor in'enquista dal TCS ponderescha la mesadad da la populaziun svizra da cumprar ils proxims onns in auto electric. Er la Confederaziun vul che la e-mobilitad duai giugar ina pli gronda rolla. Fin il 2022 duain radund 15% dals autos immatriculads da nov esser autos electrics. Ozendi fan ils autos electrics or be radund 3%.
Proteger l'ambient
L'interess vid la mobilitad electrica è grond. L'institut da perscrutaziun gfs.bern ha fatg in studi nua che 20% dals dumandads han inditgà ch'els vulan «fitg probabel» cumprar ils proxims trais onns in auto electric. Tar radund 30% dals dumandads vala la cumpra d'in tal auto sco «plitost probabel».
Sco raschun principala han las persunas dumandadas inditgà da vulair reducir las emissiuns da CO2 e da vulair uschia proteger l’ambient. Bun in terz dals dumandads èn da l'avis ch'il futur tutga als autos electrics.
Memia paucas staziuns da chargiar
Quels che na vulan cumprar nagin auto electric, han motivà quai cun ils custs elevads per cumprar uschè in auto, las paucas staziuns per chargiar e las pitschnas distanzas ch’ins po far cun ils autos.
Per che la e-mobilitad possia far il pass en il martgà da massa, saja l'infrastructura decisiva, crai il TCS. Staziuns per chargiar manchian sur tut sin vias publicas ed al domicil. Ils tancadis per autos electrics stoppian daventar uschè evidents sco tancadis normals.
Ord l'archiv:
Il 2016 han ils parlamentaris grischuns ina giada pudì testar intgins autos electrics durant ina sessiun.
RR novitads 14:00