L'october 2020 aveva la Alliance Swisspass communitgà ch'i dettia be pli las cartas dal di per ir cun tren als spurtegls da las vischnancas fin la fin dal 2023. Il medem temp aveva l'organisaziun dal traffic public accentuà da vulair sviluppar in product per remplazzar quellas, ensemen cun ils partenaris da la Federaziun svizra da vischnancas e cun la Federaziun svizra da citads.
Cunquai che las federaziuns sco era las vischnancas han sustegnì il concept per la nova «carta da spargn dal di vischnanca» en occasiun da la preschentaziun la stad, è uss vegnì preschentà il nov product.
Contingent svizzer, dus stgalims da pretsch
La nova carta dal di pon ins cumprar exclusivamain als spurtegls da las vischnancas. Quai era per porscher las cartas da spargn a persunas betg affinas al mund digital. Da nov na datti en pli betg pli in contingent per vischnanca, mabain simplamain in contingent svizzer. Uschia croda era la regla da mo dastgar vender ad abitants ed abitantas da l'atgna vischnanca. I vegn a dar ina pagina d'internet per s'infurmar per tge dis ch'i dat anc quantas cartas.
Sco tar las normalas cartas da spargn datti era tar las cartas da spargn da las vischnancas dus stgalims da pretsch. Tgi che cumpra quella fin a 10 dis avant il di da viadi profitescha il pli fitg. Per ina carta cun abunament da mesa-taxa custa la carta alura 39 francs. Ins po cumprar tantas cartas sco ch' ins vul, quellas vegnan tuttas persunalisadas e pon vegnir retratgas sco bigliet stampà u via e-mail.
Vischnancas e citads èn cuntentas
Ils custs per la vendita surpiglia, tenor communicaziun, la branscha dal traffic public. Tant la represchentanta da las vischnancas sco quella da las citads èn fitg cuntentas cun la schliaziun. La populaziun possia uss retrair las cartas senza limitaziun dal lieu, e las vischnancas n'hajan nagin risico finanzial, perquai ch'i vegnia mo quintà quai che vegn era vendì.
