Tgi che fa viadis cun il traffic public en Svizra, paja en media pretschs sumegliants sco la glieud en pajais vischins. E cun l’abunament general porscha la Svizra ina pauschala fitg bunmartgada per l’entir traffic public, ch’è singulara en cumparegliaziun cun auters pajais.
Il studi ch’è vegnì fatg per incumbensa da Litra, il Servetsch d’infurmaziun per il traffic public – ha cumpareglià ils pretschs svizzers cun quels en la Germania, en l’Austria, en la Frantscha, en l’Italia, en ils Pajais Bass ed en la Gronda Britannia.
Tenor il studi èn viadis entaifer ina citad e tranter duas citads en cumparegliaziun favuraivels en Svizra. Plitost char è il traffic public percunter en las aglomeraziuns.
Auta qualitad – ma betg fitg spert
In grond avantatg dal sistem svizzer saja dentant ch'ins possia cumprar in bigliet gist per l’entir viadi e na stoppia betg cumprar per mintga midada in bigliet separà.
Fitg buna saja era la qualitad dal traffic public. Betg mo quai che pertutgia la punctualitad, mabain era tar la spessezza da la purschida saja la Svizra top. Auter dentant quai che pertutga la spertadad. Quai haja per gronda part da far cun la topografia da la Svizra, decleran ils auturs dal studi.
Trend vers pretschs flexibels
Il studi constatescha vinavant, ch’il sectur dal traffic public purscheva avant diesch onns pauca pretschs differents. Entant enconuschian tut ils pajais resguardads tariffas flexiblas per cuntanscher dapli clients e clientas. L’idea saja da far pli attractiv il traffic public per quels e quellas che fan sulettamain viadis sporadics u en il temp liber.
