Traffic public - Lingia da tren tranter Genevra e Losanna è interrutta
Dapi mardi saira suenter las 17:00 è il traffic da trens tranter Genevra e Losanna interrut. Raschun èn binaris ruts a Tolochenaz (VD). Il traffic da trens resta sistì.
Oriundamain avevan las Viafiers federalas puspè vulì laschar passar ils trens a partir da mesemna la damaun. Ma mesiras da segirezza hajan sfurzà els da puspè interrumper il manaschi. Sut ils binaris saja s'averta ina nova rusna.
Ina interpresa privata haja chavà radund 10 meters sut ils binaris ina fora per pudair metter bischens. Lavurers sajan uss vidlonder da serrar la rusna e reparar ils binaris.
1 / 3
Legenda:
Ier saira hai gia dà ina rusna sut ils binaris.
Keystone
2 / 3
Legenda:
Chaschunà quella han lavurs da construcziun d'ina interpresa privata che han lavurà sut ils binaris.
Keystone
3 / 3
Legenda:
Cun questa lingia è la colliaziun la pli impurtanta da tren tranter l'ost ed il vest da la Svizra interrutta.
Keystone
Sin il traject pertutgà curseschan per il mument bus da remplazzament. Il traject da Genevra a Losanna è la lingia centrala che collia l'ost ed il vest.
