Il nov urari da tren porta oravant tut material rudlant, per exempel sin ils trajects tras il Gottard u en la Germania. Las pli grondas midadas datti dentant en la Svizra romanda. Cun l'introducziun dal tren regiunal obtegn la regiun Genevra il pli grond sistem da tren regiunal en Europa. Sis lingias servan da nov 45 staziuns e duain pliras giadas per uras traversar ils cunfins.
Viafier retica
Il pli fitg vegn la purschida extendida sin il traject da Landquart a Tavau. Quella s'avischina ad in tact da mes'ura, quai oravant tut las fins d'emna. Tranter Rehanau e Glion, per part gia davent da Cuira, circuleschan la stad trens d'aventura l'entira fin d'emna, pia da nov er la sonda. Ulteriuras colliaziuns datti er sin la lingia da l'Alvra e dal Veraina.
Dapli purschida da bus
En il sectur dals bus vegnan serradas largias en il tact sin intginas lingias ed extendidas las purschidas durant las uras marginalas. Las ulteriuras colliaziuns en il Grischun èn vegnids preschentadas la fin da november.
Ord l'archiv - per tadlar curt e cumpact
Midada d'urari è gartegiada senza problems
Il manaschi funcziunia senza problems ed er il nov Léman Express en la Svizra franzosa saja partì bain, communitgescha la SBB. Pervi da la chauma en la Frantscha n'ha il traffic da trens regiunals sur cunfin anc betg pudì vegnir realisà cumplettamain. Quai succedia dentant pass per pass, scriva la SBB. Il Léman Express cursescha tranter ils chantuns Vad, Genevra ed en la Haute-Savoie en Frantscha.
RTR novitads 08:00+