Be 5% da las ciclistas e dals ciclists portan ina vesta da segirezza, il di ora perfin be 3%. Quai scriva il Post da consultaziun svizzer per la prevenziun d'accidents (BFU). Raschun saja che blers n'hajan anc mai ponderà da purtar ina tala vesta.
Il ristg d'ina collisiun sa reducescha per passa 40%, sch'ins porta ina vesta. Quai haja in studi danais mussà. Las vestas gidian plinavant en il stgir sco era durant il di. Reflecturs e strivlas gidian sur tut en il stgir, fertant che las colurs vivas augmentan la visibilitad durant il di. Quest punct, na vesian dentant betg tuts. In'enquista dal BFU mussa numnadamain ch'ils blers èn persvas ch'ina tala vesta porta be pauc u nagut durant il di. Durant il temp tranter di e notg u la notg èn ils ciclists e las ciclistas pli pertschertas da l'effect.
Ils pli blers che portan vestas èn da chattar tranter ils manischunzs e las manischunzas dals e-bikes svelts. Là dovran 21% las vestas durant la notg e 10% er durant il di.
Campagna cun purtrets d'animals
Sin ils purtrets da la campagna èsi da vesair animals che portan ina vesta da segirezza. Quels sa drizzan als fans da velos. Millis animals perdian numnadamain mintg'onn lur vita sin las vias.
