Pli autas deducziuns per uffants tar la taglia federala directa na sajan betg giustifitgadas. Da quellas profiteschian mo ils pli ritgs. Da quest avis èn la PS ed ils Verds, ch'han lantschà lur campagna per la votaziun davart il referendum ch'è ils 27 da settember.
L’emprim aveva il Cussegl federal proponì, d’augmentar la limita per trair giu custs da tgira d’uffants tras terzas persunas. D’augmentar la limita da 10’100 sin 25’000 francs avess custà 10 milliun francs.
Il parlament ha cumandà la festa
Il parlament ha lura dentant decidì d'augmentar la deducziun generala per uffants da 6’500 sin 10’000 francs. Quai duai distgargiar famiglias che tgiran lur uffants a chasa. Tenor quints dals socialdemocrats purtass questa midada ina perdita da taglia da 370 milliun francs.
Ils adversaris da la nova lescha promovessan dentant pli gugent canortas d'uffants – e sco els din l'egualitad. Cun augmentar las deducziuns sco planisà en la lescha, vegnian mo vegls stereotips cementads.