Siglir tar il cuntegn
Inhalt

Svizra Trair giu multas da l'exteriur da la taglia

La cumissiun d'economia dal Cussegl dals chantuns vul ch'interpresas svizras possian trair giu da la taglia las multas ch'ellas ston pajar en l'exteriur. Cun quest avis cuntradi la cumissiun al Cussegl federal.

Leschas da taglia.
Legenda: Per il mument na datti nagin reglament explicit schebain che interpresas dastgan trair giu las multas u betg. Keystone

Tenor il Cussegl federal duain interpresas svizras betg pudair trair giu multas da la taglia. Tant sche la Svizra sco sche l'exteriur proclamescha las multas.

La cumissiun d'economia dal Cussegl dals chantuns ha dentant decidì cun 6 cunter 4 vuschs tar 3 abstenziuns ch'els vulan far ina separaziun: Tar multas proclamadas en l'exteriur duessan interpresas svizras pudair trair giu quellas da las taglias. Quai perquai che mesiras penalas en l'exteriur hajan savens in aspect politic, uschia il tenor en la chombra pitschna. Las interpresas vegnissan chastiadas dublamain, sch’ellas na possian betg trair giu lur expensas da la taglia.

Nagin reglament explicit

Ozendi datti nagin reglament fix areguard il fatg sche interpresas dastgan trair giu multas da la taglia ni betg. Uschia datti differentas execuziuns en ils chantuns. Per metter d'ina vart malsegirtads da dretg aveva il parlament incumbensà il Cussegl federal dad elavurar in reglament.

Ch'il Cussegl federal è sa decidì ch'i duai betg esser pussaivel ha la raschun che l'effect da chasti sa sminueschia sche las interpresas possian trair giu la multa da la taglia. Plinavant avessan ils pajataglias da contribuir a las multas. Quai na sappia betg esser il cas. Perquai duain las interpresas mo pudair trair giu da la taglia sancziuns per reducir il gudogn. Dentant naginas multas.

RR novitads 15:00