Trais per part grevblessads tar sajettada a Turitg

Tar ina sajettada en la stanza d'oraziun dal Center Islamic a Turitg, datiers da la staziun principala èn trais umens da 30, 35 e 56 onns vegnids blessads per part grevamain. Il delinquent nunenconuschent, medemamain in um, è anc sin fugia. Per la populaziun na dettia nagin privel.

Laschar ir video «Schiesserei in Zürich»

Schiesserei in Zürich

0:30 min, dals 19.12.2016

Sco quai che la procura publica e la polizia communitgeschan haja dà ils sajets enturn las 17:30. In um da circa 30 onns saja entrà en la stanza d'oraziun ed haja cumenzà a sajettar enturn.

Suenter è il delinquent supponì fugì ord la moschea en direcziun da l'areal da l'arsenal. El ha purtà vestgadira stgira sco era ina chapitscha da launa. La polizia ha lantschà ina tschertga gronda, n'ha fin ussa betg pudì tschiffar l'um.

Il mument na dettia naginas ulteriuras infurmaziuns davart ils pertutgads u il delict, han communitgà las autoritads.

Ulteriura acziun da la polizia

Be intgins 100 meters davent dal Center islamic a Turitg datti il mument in'ulteriura acziun da la polizia. Sco i para è vegnì chattà ina bara. In connex cun la sajettada en il Center Islamic n'è betg confermada. Tenor in correspondent da l'agentura da novitads SDA haja la polizia tschentà ina tenda alva sut la Gessnerbrücke. La polizia da la citad scriva che las examinaziuns giajan parallel.

Enturn omadus lieus dals delicts patruglieschan policists armads cun chauns.

RR novitads 20:00 ++