Sco quai ch'il concern da latg communitgescha, saja la Emmi Frisch-Service SA ussa sut ina grondezza critica per manar vinavant la fatschenta a moda effizienta. Emmi haja perquai decidì da vender la figlia a la gruppa Transgourmet. Ins haja ils davos mais analisà pliras pussaivladads per pudair segirar la cuntinuaziun. E perquai saja uss vegnì decidì da vender la fatschenta a Transgourmet. Tut las var 160 collavuraturas e collavuraturs midan tenor communicaziun tar Transgourmet.
Intent da la fatschenta
Emmi Frisch-Service SA è tenor atgnas indicaziuns sa furmada da las firmas Burra ed Interfrais. Ella furnescha var 4'000 manaschis (spitals e chasas da tgira, butias da convenience, detaglist e grossists). La fatschenta aveva l'entschatta il scopo da furnir products dad Emmi a las bleras interpresas independentas ch'ins n'ha sur autras vias betg pudì cuntanscher.
RR novitads 08:00