Ils burgais han annunzià da gnanc vulair entrar en la debatta davart la revisiun da la lescha da locaziun.
Transparenza, confidenza e segirtad giuridica
Per la cussegliera naziunala Sibel Aslan dals Verds porta la nova obligaziun da formular en quels trais puncts gronds meglieraments. En emprima lingia per ils locataris. «Per lez èsi difficil da dumandar quellas infurmaziuns dal locatur. Quai po vegnir valità sco segn da disfidanza. I è perquai meglier sche quai è reglà sin nivel federal.»
Tenor la proposta dal Cusseglier federal Johann Schneider-Ammann duai il locatur stuair nudar sin il formular con tschains che l’antecessur ha pajà. In’eventual augment dal tschains sto vegnir argumentads. Al cusseglier naziunal da la PPS, Hans Egloff, ch'è er il president da l'Associaziun svizra dals proprietaris da chasas, na plascha quai insumma betg.
Mintg’on ston vegnir repartids passa ina mesa milliun formulars. Quai n’è nagut auter che d’intimar ils locataris da controllar en detagl il contract ed en cas da dubi da purtar plant cunter il locatur.
In tal formular na dovri betg. La gronda maioritad dals locataris sajan numnadamain cuntent cun la prestaziun ed il pretsch da lur abitaziun. Plinavant na possian ins cun in tal formular era betg cumbatter la mancanza d’abitaziuns els centers svizzers. Anzi il cuntrari, di Egloff. «Il formular è in ulteriur pass en direcziun da la surregulaziun che maina ad ina intschertezza giuridica. Quai fraina lura las investiziuns e la fin finala vegnan bajegiadas damain abitaziuns. Enstagl da novs formulars stuess'ins reducir la birocrazia e las prescripziuns. Quai purtassi bler dapli,» è Egloff persvadi.
Possian ins tut discutar, respunda Sibel Aslan. Mo l’emprim dovri ina regulaziun naziunala cun quels formulars che hajan, quai mussian studis, en pliras regiuns franà l’augment rasant dals tschains da locaziun. «Set chantuns han introducì ils formulars ed hajan fatg bunas experientschas. Ins vesia uschia che l’obligaziun da formular è sa cumprovada.»
Grev stan per il formular
En il Cussegl naziunal vegn la revisiun da la lescha da locaziun ad avair grev. Gia la cumissiun ha decidì cun 13 cunter 12 vuschs da betg entrar en materia. Ed el cussegl è il dumber dals adversaris anc pli grond. Quai sa era Sibel Aslan. Sche la revisiun fetschia naufragi stoppia ins perquai vegnir activs en ils chantuns e mirar che lez introduceschian l'obligaziun da formular. Ceder na vegni betg en dumonda.