Siglir tar il cuntegn

Header

Bus.
Legenda: Sin la nov lingia da Ibergeregg ha Bus alpin transportà radund 25'000 passagiers. MAD, Bus alpin
cuntegn

Transport da viandants Bus alpin danovamain cun cifras da record

En tut han passa 130'000 persunas fatg diever durant la stad passada d'ina da las 17 lingias da bus en muntogna.

Il Bus alpin ha transportà la stad 2019 tants passagiers sco anc mai. Bunamain 132'000 persunas han fatg diever durant la stad passada da la purschida, sco l’uniun Bus alpin ha communitgà. L'onn avant aveva Bus alpin transportà bun 106'000 passagiers.

La stad passada ha Bus alpin surpiglià en il chantun Sviz la lingia da bus Ibergeregg. Be sin quella lingia èn vegnids dumbrads durant la stad radund 25'000 passagiers. Er senza resguardar quella cifra, ha Bus alpin pudì augmentar il dumber da passagiers per 1,2% cumpareglià cun l'onn avant.

Greina e Pany-St.Antönien èn lingias dumandadas

Entant transporta Bus alpin viandants en 17 differenta regiuns da muntogna. En Grischun èn quai las lingias Beverin, Alp Flex, Bravuogn/Alvra, Greina e Pany-St.Antönien. Da quellas han surtut las lingias Greina e Pany-St.Antönien pudì augmentar las frequenzas.

L’uniun Bus alpin è vegnida fundada il 2011 cun l’intenziun da promover il turissem en regiuns muntagnardas. Ella vegn tranter auter sustegnida da l’AutoDaPosta, dal Club alpin Svizzer, sco er da la Gruppa svizra per las regiuns da muntogna.

RTR novitads 16:00

Artitgels legids il pli savens

Scrollar a sanestra Scrollar a dretga