Siglir tar il cuntegn

Header

Navigaziun

Tren special cun viagiaturs giuvens che guardan ord fanestra.
Legenda: Ils trens da las Viafiers federalas han manà quest onn 3 milliuns viagiaturs ad occurrenzas grondas. Keystone
cuntegn

Svizra Transportà 3 milliuns persunas a 300 occurenzas grondas

Las Viafiers federalas tiran curt avant la fin da l'onn bilantscha davart lur onn da gronds eveniments. Tenor quai ha la SBB transportà il 2018 radund 3 milliuns viagiaturs a passa 300 occurenzas grondas.

In dals pli gronds eveniments saja stada il campiunadi mundial da professiuns – Swiss Skills a Berna. Tenor atgna communicaziun ha l’SBB transportà passa 50’000 giuvenils entaifer 3 dis en 50 trens supplementar. Quai sajan stads pli che dubel uschè bleras persunas sco anc avant quatter onns. Ulteriuras grondas manifestaziuns per las Viafiers federalas èn stadas la visita da Papa Francestg a Genevra e la cursa da furmla E a Turitg.

Per tut las occurenzas grondas ha la SBB impundì 800 trens spezials e 1'300 trens cun chars supplementars. Quai èn bunamain tuttina blers sco il 2017. Lura avevan las Viafiers federalas impundì 790 trens specials e 1'250 trens cun chars supplementars.

Onn dad events 2019

Cun in veritabel onn dad events quintan las Viafiers federalas l'onn che vegn. Per la Festa federala da lutga e da gieus alpesters a Zug vegnan spetgads radund 380'000 visitaders ed a la Festa federala da gimnastica ad Aarau radund 70'000 gimnastas e gimnasts.

Per la Fête des Vignerons a Vevey ch'ha lieu mo mintga 20 onns spetgan ils organisaturs schizunt 700'000 visitaders e visitadras. Ed a la festa da Turitg quinta la SBB cun 2,1 milliuns visitaders.

RR novitads 14:00