Bombardier haja adattà la software da las portas dal tren da dus plans FV-Dosto. Vinavant saja il tren nov en viadi pli quiet. Quai pervi da novas rodas sco era ina adattaziun vi da la software che ballantscha il tren en las stortas. Ulteriurs tests ed adattaments seguian ils proxims mais per schliar ils ulteriurs problems.
Enfin la midada da l'urari en december duain tut ils trens novs esser equipà cun la nova software. Las Viafiers federalas vulan lura era introducir il nov model da tren sin il traject Cuira-Turitg-Basilea. Sin il traject Cuira Son Gagl van ils trens novs schon.
Problem da las rampas
L'organisaziun «Inclusion Handicap» ha crititgà las rampas per persunas en sutgas cun rodas. Quellas rampas sajan memia stippas. Els han perquai fatg recurs tar il Tribunal administrativ federal – quel era da l'avis il trens saja tenor ils basegns da persunas cun impediments.
Las Viafiers federalas hajan uss cumprovà, che la gronda part da las rampas sajan en urden. Mo set da las total 76 rampas sajan memia stippas. Il recurs n'haja tenor las viafiers nagin'influenza, cura e nua ch'ils novs trens vegnan en futur duvrads.
RR novitads 12:00
