Quai resulta da l'emprim trend da votaziun da l'institut gfs.berna.
Tendenza na a l'iniziativa d'energia
Uschè cleramain n'haja el gia ditg betg pli pudì prognostitgar in "na", di Claude Longchamp. Ils 20 da schaner avessen be 29 % vuschà per l'iniziativa "Taglia d'energia empè da la taglia sin la plivalur" da la partida verd-liberala. “Nus faschain quint che il consentiment per l’iniziativa va enavos anc dapli fin ils 8 da mars”, di Longchamp.
Era sch'i dettia in grond consens en la populaziun svizra ch'i dovria stimuls per spargnar energia, para la via proponida dals Verd-liberals memia ristgada. “Radund 70% dals Svizzers e da las Svizras èn cunter l’aboliziun da la taxa sin la plivalur. E quest fatg saja la basa per decider l’iniziativa d’energia”, uschè Longchamp. La Partida verd-liberala sto damai far quint che sia emprim'iniziativa fa naufragi a l'urna.
Plitost gea a l'iniziativa da famiglia
Auter guarda quai ora tar l'iniziativa "Sustegnair las famiglias! Nagina taglia sin supplements per uffants e sin supplements da scolaziun" da la Partida cristian-democratica. 52% dals votants e da las votantas avessan mess tendenzialmain in "gea" en l'urna. L'iniziativa haja simpatisants da tut las colurs, era sch'il cussegl federal sco er il parlament han cusseglià cleramain da la refusar. Oravant tut famiglias cun uffants din gea a l'iniziativa.
Bunamain unanimamain cunter l'iniziativa sajan actualmain be commembers da la PLD e pensiunads. Sper l’argument che l’iniziativa procuria per deficits d’entrada tar ils chantuns e la confederaziun, na dettia anc betg arguments dals contrahents da l’iniziativa che s’hajan etablids, declera la politologa Martina Imfeld il resultat positiv.
Normalmain perda però in'iniziativa consentiment durant il cumbat electoral, e quai saja fitg probabel era tar l'iniziativa da famiglia da la PCD. Tuttina datti qua in "ma”: La PPS ha decis surprendentamain la parola per l’iniziativa da famiglia, e quai suenter cha la pli gronda part dals exponents dal PPS avevan anc vuschà cunter l’iniziativa en il parlament. Quest “turnaround” pudess procurar per ina basa anc pli ferma per l’iniziativa.
Era sche l'iniziativa da famiglia saja potenzialmain acceptabla per la maioritad fa il gfs.bern plitost quint cun in na a l'urna ils 8 da mars.
RR novitads 17:00