Siglir tar il cuntegn

Svizra Trend da votaziuns: na a las iniziativas - avert tar las leschas

Sche las votaziuns dal zercladur fissan stadas ils 26 da matg, lura avessi dà in na a las duas iniziativas (taglia sin ierta e stipendis). Tar las leschas n'avess quai dà naginas maioritads absolutas - però levs trends: Dapli sustegn per la «diagnostica da preimplantaziun» - damain per la «LRTV».

Avert - però plitost gea a la «diagnostica da preimplantaziun»

Il conclus federal davart la diagnostica da preimplantaziun avessan approvà 46% (+6) da las persunas che van a votar. 40% (-4) fissan encunter, uschia ch'i resulta 14% (-2) che n'èn anc betg sa decidids.

Legende: Video Trend da votaziuns per ils 14 da zercladur 2015 abspielen. Laufzeit 1:51 Minuten.
Or da Telesguard dals 03.06.2015.

Dapi l'emprima unda da l'avrigl è l'opiniun publica pia sa sviluppada en favur dal conclus federal. Quai però senza ch'ina da las duas varts haja ina maioritad absoluta.

Las differenzas d'opiniun sa cristalliseschan tenor l'institut gfs.bern surtut perlung il cunfin da gruppas favuraivlas e dischfavuraivlas al progress. I vegn reflectà tant il niz per la Svizra, però era la tema dal maldiever influenzescha l'opiniun.

Tar las partidas èn ils aderents surtut en l'electorat da la PS e la PLD, ils adversaris plitost en l'electorat da PPS e PCD.

La retschertga

Sin incumbensa da la SSR ha l'institut da perscrutaziun gfs.bern dumandà 1'405 votantas e votants cun domicil en Svizra, tge ch'ellas vegnian a votar tar ils projects dals 14 da zercladur. Questa segunda unda è stada dals 22 ed ils 30 da matg. La toleranza dal resultat è tar +/- 2.7%.

Na a l'«iniziativa davart ils stipendis»

L'iniziativa da stipendis fiss vegnida refusada cun 50% (+13) na vers 38% (-11) gea. Quai tar 12% (-2) persunas indecisas.

L'institut gfs.bern quinta cun in na a l'iniziativa da stipendis, suenter che lezza cumpart è creschida il pli fitg vers la retschertga da l'avrigl, e la cumpart favurisanta è sa sminuida cuntercomi. L'opiniun publica sa sviluppia uschia vers in na. Quest trend vegnia a continuar, quinta gfs.bern, surtut resguardont ils svilups tar autras votaziuns davart temas semeglionts.

Las differenzas qua sa mussian en ils champs convenziunals tranter electorat da las partidas burgaisas e da las partidas da la sanestra, però era perlung da las classas d'entradas. En egl dat che la Svizra franzosa è significant pli favuraivla a l'iniziativa da stipendis che l'ulteriura Svizra.

Na a l'«iniziativa davart la taglia sin l'ierta»

L'iniziativa davart la taglia sin l'ierta fiss vegnida refusada 61% (+10) cunter 34% (-4) ch'avessan ditg gea. Quai tar 5% (-6) persunas che na savessan anc betg, tge votar.

L'institut gfs.bern quinta ch'il trend vers in na continueschia en l'opiniun publica. Quai suenter ch'ils adversaris eran ordavant gia dapi l'emprima retschertga.

Las differenzas qua sa manifesteschan tenor l'institut tranter ils champs convenziunals da las partidas burgaisas e questas da la sanestra.

Avert - però plitost na a la «LRTV»

La lescha da radio e televisiun fiss vegnida refusada cun 47% (+2) na encunter 43% (-3) gea. Qua tar ina quota da persunas indecisas da 10% (+1).

L'institut gfs.bern quinta plitost cun in na a la lescha, cunquai che las persunas indecisas sa repartgan tar votaziuns davart projects da l'administraziun il pli probabel sin omaduas varts.

Las differenzas constatescha la retschertga che surtut la Svizra franzosa è favuraivla a la lescha. En la Svizra tudestga datti però plitost in svilup vers in na. Tenor la retschertga èn las differenzas era vesiblas perlung ils cunfins linguistics - quai surtut tranter maioritads e minoritads linguisticas.