Siglir tar il cuntegn

Header

video
Barometer da votaziuns
Or da Telesguard dals 25.02.2015.
laschar ir. Durada: 1 minuta 35 Secundas.
cuntegn

Svizra Trend da votaziuns - na probabel e na cler

Il pievel svizzer avess refusà omadus projects da votaziun dals 8 da mars, sch'i fiss vegnì votà ils 17 da favrer 2015. 50% da las votantas ed ils votants avess ditg na a l'iniziativa da famiglia e perfin 73% avessan ditg na a l'iniziativa per ina taglia sin l'energia enstagl sin la plivalur.

Quai mussa il segund trend da votaziuns da l'institut gfs.berna.

Tendenza vers in na per l'iniziativa da famiglia

Diagram a colonnas che mussa ina survista quants che schessan gie, na u che n’èn anc betg segirs pertutgant l’iniziativa da famiglias.
Legenda: L’iniziativa da la PCD fa naufragi tenor il trend da votaziun. RTR

L'iniziativa da famiglia da la PCD ha pers accoglientscha tar votantas e votants: Tar l'emprim trend da votaziun dals 20 da schaner eran anc 33% cunter l'iniziativa, ussa è la cifra creschida sin in na da 50%. Era sche 10% èn anc indecis tge votar, mussa l'experientscha che la cumpart che votescha na crescha mintgamai anc avant las votaziuns.

L'iniziativa da famiglia na persvada betg, era sche l'argument da sustegnair e distgargiar las famiglias vegn renconuschì da tuttas varts. Gnanc la PPS, che ha decidì la parola gea, vegn da mobilisar sia basa. "En quest cas politisescha l'elita da la partida sper la basa vi", di Claude Longchamp da l'institut gfs.berna. Sia interpretaziun: Sustegnair las famiglias è gist, i na dastga dentant betg custar memia bler ed i stuess esser in sustegn fair per tuts.

Nagina schanza per l'iniziativa dals verd-liberals

Diagram a colonnas che mussa ina survista quants che schessan gie, na u che n’èn anc betg segirs pertutgant la taglia d’energia.
Legenda: 73% schessan na ad ina taglia d’energia. RTR

Creschì dapi l'ultim trend da votaziuns è era la cumpart da votantas e votants cunter l'iniziativa per ina taglia sin l'energia enstagl sin la plivalur: 73% avessan mess in na en l'urna sch'i fiss vegnì votà ils 17 da favrer. Per l'institut gfs.berna è in na a l'urna ils 8 da mars 2015 perquai gia ussa cler.

Il quint è numnadamain fitg simpel: Verd-liberals e verds vegnan ensemen sin in potenzial da vuschs da 14%. E be questas duas partidas sustegnan uffizialmain l'iniziativa dals verd-liberals. Als iniziants n'èsi definitivamain betg grategià da persvader ina gruppa da lur arguments. Il president da la Partida verd-liberala svizra Martin Bäumle aveva anc annunzià ch'in gea da 30% fiss in success e 20% fiss in flop. Il trend actual mussa in gea da 19%.

Suveran na vul nagins risicos

Il clima per midaments da sistems è il mument dischavantagius. Surtut dus eveniments da las ultimas emnas sajan decisivs per quest clima che ha rinforzà il trend vers in na: D'ina vart l'aboliziun dal curs minimal da l'euro e da l'autra vart l'annunzia dal Cussegl federal ch'ins stoppia per l'emprima giada dapi 15 onns preschentar in deficit dal budget.

En vista a temps economics malsegirs na veglian votantas e votants betg ir en risicos, concluda Claude Longchamp da l'institut gfs.berna.

Per il segund trend da votaziun ha l'institut gfs.berna dumandà 1’416 persunas e quai tranter ils 16 ed ils 21 da favrer 2015.

RR novitads 17:00

Artitgels legids il pli savens