Malgrà ina reorganisaziun avant trais onns na vegnia il Tribunal administrativ federal betg meglier a frida cun las pendenzas. Uschia eran il 2018 var 5’800 cas pendents. Quai sajan passa 40% dapli ch’anc avant 4 onns.
Proceduras pli lungas
Sper l’augment da cas constatescha la Controlla federala da finanzas era – che las proceduras cuzzian adina pli ditg. Surtut per cas en connex cun il dretg d’asil giajan ellas pli ditg che previs.
En ses rapport recumonda la CFF, tranter auter, al Tribunal federal administrativ da disponer il persunal a moda pli simpla e flexibla. Il Tribunal da sia vart ha reagì sin il rapport ed ha communitgà ch’els hajan introducì l’entschatta da l’onn in sistem per disponer persunal sco era per reparter meglier las lavurs.
RR novitads 23:00