Tgi che na va betg d'accord cun ina decisiun da la KESB, l'autoritad per la protecziun da l'uffant e da creschids – ha paucas schanzas davant il Tribunal federal. Quai rapporta la «Sonntags-Zeitung» sin basa d’ina analisa da tschients da cas.
Sulettamain tar 5% dals cas vegnia ina decisiun curregida. Quai mussian las bunamain 800 decisiuns da la KESB ch'èn arrivadas dal 2013 fin il fanadur da quest onn davant dretgira a Losanna, sco la gasetta scriva.
Paucas correcturas
Per il Tribunal federal saja la pitschna quota da success da las persunas che portan plant in segn – che las autoritads chantunalas da la KESB lavurian a moda correcta, scriva la «Sonntags-Zeitung». Lur decisiuns vegnian mo darar curregidas.
En egl croda era, che la gronda part da las decisiuns da la KESB contestadas davant dretgira, derivan da la Svizra tudestga. La Svizra franzosa ha tenor in expert dumandà da la gasetta damain abitants, e dapli fidanza en las decisiuns da la KESB.
En l’entira Svizra datti ad onn radund 300'000 decisiuns da la KESB, l'autoritad per la protecziun da l'uffant e da creschids.
