- Il Tribunal federal a Losanna ha refusà in recurs d'ina mamma dal chantun Basilea-Citad che na vuleva betg trametter a scola ses figl.
- Gia avant aveva il departament d'educaziun da Basilea refusà ina tala dumonda.
- La mamma aveva argumentà ch'il figl fitg talentà, ch'era gia sursiglì ina classa, saja pertutgads da mobing en la scola publica.
I na dat nagin dretg absolut d'instruir a chasa uffants ch'avessan dad ir en la scola primara. Quai ha decis il Tribunal federal e refusà in recurs d'ina mamma dal chantun Basilea-Citad. Quella aveva dumandà avant dus onns il departament d'educaziun chantunal dastgar instruir ses figl naschì il 2009 a chasa.
Motivs cumprovabels
La decisiun negativa ha la mamma lura tratg vinavant cun sa referir sin la Constituziun federala che pretenda da respectar la vita privata e la vita da famiglia. Era il Tribunal federal ha uss refusà la dumonda. Tenor il Tribunal federal na cuntradi quest dretg betg a reglas chantunalas er pli severas. Igl è chaussa dals chantuns da reglar sche u en tge dimensiun che «Homeschooling» è lubì. E tenor la lescha da scola ston per ina lubientscha tranter auter esser avant maun motivs cumprovabels ch'i n'è betg pussaivel che l'uffant po visitar la scola.
Ord l'archiv
En Svizra vegnan passa 2'000 uffants instruids a chasa ed il dumber crescha cuntinuadamain. En il Grischun datti enfin uss però be 4 cas.
RR novitads 14:00