Siglir tar il cuntegn

Header

Navigaziun

Persuna dependenta.
Legenda: Fin uss valeva ina malsogna da dependenza betg sco raschun per ina renta. Keystone
cuntegn

Tribunal federal Renta d'invaliditad er tar dependenza

Il Tribunal federal ha midà sia giurisdicziun per valitar il dretg sin ina renta d'invaliditad. Persunas cun ina malsogna da dependenza vegnan da nov tractadas tuttina sco persunas cun ina malsogna psichica. Fin uss na valeva ina malsogna da dependenza betg sco raschun per ina renta.

Da nov pon er persunas cun ina malsogna da dependenza retschaiver ina renta dad invaliditad. Quai ha decis la segunda chombra per dretg social dal Tribunal federal a Lucerna. Da nov vegn ina malsogna da dependenza tractada tuttina sco ina malsogna psichica. En il cas singul sto vegnir sclerì cun agid da criteris objectivs, sche la persuna pertutgada po lavurar parzialmain u a temp cumplain.

Fin uss n’avevan dependents nagin dretg sin ina renta d’invaliditad. Ins gieva da quai anora che la persuna saja dependenta per atgna culpa. Ina malsogna da dependenza era mo lu ina raschun per ina renta, sche quella aveva manà ad in accident u ad ina malsogna ubain sche la dependenza era la consequenza d'ina malsogna.

Dependenza è ina malsogna

Il Tribunal federal mida la pratica tar malsognas da dependenza sin basa da scuvertas medicinalas. Ord vista medicinala saja ina dependenza ina malsogna e perquai saja ina tala da tractar sco ina malsogna psichica, argumentescha la dretgira.

Ils derschaders da Lucerna accentueschan dentant en lur sentenzia, che las persunas segiradas hajan l'obligaziun da minimar il donn. I possia perquai vegnir pretendì, ch'ellas sa participeschian ad ina mesira medicinala supportabla. Sch'ina persuna pertutgada refusia quai, lura possian las prestaziuns vegnir scursanidas.

RR novitads 12:00