Siglir tar il cuntegn

Header

cuntegn

Svizra Tribunal federal: Slogan da la PPS è rassistic

Il Tribunal federal ha confermà la sentenzia da l'anteriur secretari general da la PPS Martin Baltisser e sia substituta Silvia Bär pervi da discriminaziun da las razzas. L'inserat «Kosovaren schlitzen Schweizer auf» preschentia l'etnia dals Cosovars sco violenta e sbassia lur dignitad umana.

Il Tribunal federal a Losanna ha uschia decidì sco ultima instanza. Dus dals derschaders èn stads dal maini che la PPS haja manegià sulet in cas singul concret, la maioritad da trais derschaders è stada da l'avis che la PPS haja stgaffì in clima che discrimineschia ils Cosovars e suttamettia ad els ch'els sajan violents e criminals.

L'anteriur secretari general e sia substituta èn sentenziads ad in chasti cundiziunà. Els èn responsabels per il slogan «Das sind die Folgen der unkontrollierten Masseneinwanderung: Kosovaren schlitzen Schweizer auf» che la PPS ha duvrà en la campagna dal 2011.

Tant la dretgira regiunala Berna-Mittelland sco er la Dretgira suprema da Berna han decidì ch'il text saja rassistic. Ellas han sentenzià ils dus accusads a chastis pecuniars cundiziunads. Quai n'ha la partida populara svizra betg acceptà e tratg vinavant il cas.

La cumissiun federala cunter il rassissem ha beneventà la decisiun dal Tribunal federal a Losanna. Il cunfin da la libertad d’opiniun saja surpassà là nua che la dignitad umana vegnia surpassada, scriva la cumissiun. L’anteriur secretari general da la PPS, Martin Baltisser e la PPS èn sa mussads dischillusiunads da la decisiun.

RR novitads 14:00

Artitgels legids il pli savens