Siglir tar il cuntegn

Header

cuntegn

Svizra Trump mida chanzun

Ses pled davart la situaziun da la naziun avant il congress vegnia Trump a discurrer en in tun nunusità. El veglia procurar per «optimissem ed armonia», quai areguard la dispita tranter las partidas. Quai ha ditg in collavuratur d'aut grad da la Chas'Alva envers las medias.

En ses pled davart la situaziun da la naziun vul Trump appellar als republicans e democrats da collavurar en il parlament. Uschia hai num en in extract dal pled che l'uffizi da president ha publitgà. Ensemen possian ils democrats ed ils republicans guarir feridas veglias e chattar novas soluziuns, hai num en l'extract.

Tenor la Chas'Alva vul Trump sa concentrar en ses pled sin tschintg temas: Sin la situaziun al cunfin cun il Mexico, la dispita da commerzi cun la China, novas investiziuns en l'infrastructura, la reducziun dals pretschs da medicaments e sin la fin d'engaschis da guerra a l'ester.

Sche Trump sa tegn però vid las spetgas da ses collavuraturs che scrivan ses pleds, n'è betg cler. Auter che ses uffizi ha Trump sez dà da chapir ch'el possia er proclamar il stadi da crisa a nivel naziunal. Lura pudess el sez lubir ils daners per il mir dal cunfin cun il Mexico. Pervia da quella summa da 5,7 milliardas dollars vegnan ils republicans e democrats betg da sa cunvegnir tar in budget uschia che la regenza dals Stadis Unids è per part bloccada – l'uschenumnà «shutdown».

Pled era previs per schaner

Il pled tradiziunal davart la situaziun da la naziun era previs per il schaner. El era però vegnì spustà pervi da la dispita davart il budget. Lura aveva la scheffa da la chombra dals represchentants, Nancy Pelosi, fatg diever da dretg ed excludì Trump. Sco ella aveva ditg lura, saja Trump pir puspè bainvegnì en la chombra da represchentants cura che la bloccada da la regenza saja a fin.

RR novitads 06:00

Artitgels legids il pli savens