Danunder vegn noss'electricitad en il futur? Per ina gronda part ord funtaunas regenerablas sco vent, aua u era sulegl. Mo per ch'i rendia era d'investir en novs indriz stoppian quels era suenter la fin dal sistem da la KEV, l'indemnisaziun per cuvrir ils custs da la furniziun d'electricitad, retschaiver in sustegn finanzial. Mo uschia possian ins impedir ina rusna en la producziun d’electricitad. Da quest avis è suenter il Cussegl naziunal era il Cussegl dals chantuns ed ha perquai era detg Gea ad in'iniziativa parlamentara che vul segirar il sustegn per tals indriz enfin il 2030.
Betg negliger ils tschains d’aua
La Chombra gronda vul dentant anc dapli. In'allianza da represchentants dals chantuns da muntogna ha persvadì il Cussegl dals chantuns dad era gist prolungar ils tschains d'aua enfin il 2030. Oriundamain eri previs ch'il maximum da 110 francs per kilowatt prestaziun brutta valia mo enfin la fin dal 2024. Per il temp suenter dueva il Cussegl federal preschentar in nov model, il pli probabel cun tschains pli bass.
Per il cusseglier dals chantuns grischun Martin Schmid da la PLD, il president da la cumissiun preparatorica, è cler ch'ils tschains d'aua ston vegnir prolungads. Il Cussegl naziunal sez haja decidì da prolungar il supplement da rait ch'ils consuments ston pajar per promover las energias regenerablas. Cun quai vegnia l'entira discussiun enturn sustegns e custs dal provediment d'electricitad lantschada da nov.
Qua èsi per nus logic ch’era il tschains d’aua tutga vitiers. Nus vulain che la forza idraulica restia vinavant, quai per in provediment d’electricitad segir e che las concessiuns vegnian renovadas. Per cuntanscher quai dovr'ins segirtad giuridica e da planisar. E perquai n’èsi betg correct da laschar in element ordvart
«In ‘Buabatrickli’ da la Chombra pitschna»
Mo quai saja ina tut autra discussiun, respunda il cusseglier naziunal e politicher d'energia Christian Imark da la PPS. Davart ils tschains d'aua saja da decider cura ch'ins discuteschia davart il futur da l’entir provediment d'electricitad.
Ed ussa va quai per ina soluziun transitorica per impedir ina mancanza en la lescha. E là na duess’ins betg discurrer davart ils tschains d’aua perquai che quai chaschuna mo grondas discussiuns. Ed a la fin periclitescha quai l’entir project.
El n’haja perquai era betg spetgà quai pass dal Cussegl dals chantuns, conceda el. E dal tut schuber na saja quai halt lura schon betg.
Mintga represchentant d’interess emprova da segirar ses interess perquai ch’els han tema ch’il project grond, il provediment d’electricitad dal futur, che quella pudess far naufragi
«I dovra ussa segirezza da planisar»
Han ils chantuns da muntogna pia simplamain nizzegià la chaschun per segirar ils tschains d'aua era sur il 2024 ora? Martin Schmid conferma quai.
Quai è natiralmain schon era stà in patratg che nus sco represchentants dal chantun Grischun e da las vischnancas avain vulì purtar en la discussiun. Nus vulain segirezza da planisar e da dretg e nus essan persvas ch’igl è bun da reglar quai ussa per evitar che quai tema vegnia anc ina giada en il parlament mabain che nus pudain avair en vista l’entir.
E perquai saja tenor lur giuditgar absolut endretg e necessari dad ussa reglar las dumondas dal tschains d'aua enfin il 2030.
La proposta dal Cussegl dals chantuns è ussa pia sin maisa e gia glindesdi discutescha il Cussegl naziunal surlonder. Sche lez è lura propi pront da dar maun per quai cumpromiss è dentant intschert.