Siglir tar il cuntegn

Header

video
Tschains d'aua duai il mument betg vegnir sbassà
Or da Telesguard dals 20.09.2018.
laschar ir. Durada: 1 minuta 19 Secundas.
cuntegn

Svizra Tschains d'aua: «Decisiun gista per la chaussa e la politica»

Quai di la Conferenza da las regenzas dals chantuns alpins da la decisiun dal Cussegl dals chantuns. La Chombra pitschna ha decidì la gievgia da mantegnair al mument ils tschains d’aua sin livel actual e segua uschia a la proposta dal Cussegl federal. Quai rapporta l’agentura da novitads SDA.

Cun 37 a 0 vuschs tar 5 abstenziuns è sa decidida la Chombra pitschna dal parlament per la lescha dal dretg d’aua revedida. Ina minoritad era s’engaschada per reducir il maximum dal tschains d’aua sin 90 francs per sustegnair las ovras electricas, ha dentant pers cun 30 a 13 vuschs.

Be minutas suenter la decisiun dal Cussegl dals chantuns RKGK ha la Conferenza da las regenzas dals chantuns alpins gia reagì cun ina communicaziun a las medias.

«Decisiun gista per la chaussa e la politica»

Per la RKGK è la decisiun dal Cussegl dals chantuns «gista», e quai tant sin livel da la chaussa sco er sin quel politic. En sia communicaziun a las medias punctuescha la RKGK puspè che la forza idraulica n’haja betg problems da rentabilitad cun quai ch’ella tutgia tar il provediment da basa. Anzi – il svilup politic ed atgnas decisiuns mettian sut squitsch las ovras idraulicas e betg il tschains d’aua.

Ina part da la RKGK, trais umens a maisa.
Legenda: «Decisiun gista per la chaussa e la politica» è la reacziun da la RKGK (maletg d'archiv 2017: da san. Mario Cavigelli (GR), Christian Vitta (TI) e Roberto Schmidt (VS).) Keystone

Nov model per il maximum dals tschains d’aua 2025

La victoria dals chantuns da muntogna en il Cussegl dals chantuns n’è dentant betg persistenta. Ella pertutga ina perioda transitoria: Il maximum fix per tschains d’aua – 110 francs per kilowatt prestaziun brutto – duai be vegnir prolungà da la fin da l’onn 2019 fin la fin dal 2024.

La debatta n'è dentant anc betg terminada – sco proxim s’occupa il Cussegl naziunal cun il maximum dals tschains d’aua. Ed er suenter cuntinua la discussiun: A partir dal 2025 duaja dar in nov model per stabilir il maximum dals tschains d’aua.

RKGK averta per proxima runda da discussiuns

Per questa nova runda da discussiun sa mussa la RKGK bain averta. Ella renda dentant gia uss attenta a sias pretensiuns per l'avegnir dal tschains d'aua

  • I saja dad evaluar concret quanta valur che la forza idraulica creescha e tgenins novs models ch’i dettia per valurisar ella – e quai er pli independentamain dals pretschs a la bursa.
  • Las ovras idraulicas stoppian avrir lur cudeschs per mussar per propi tge ch’ellas gudognan cun l’aua.

RR novitads 11:30+

Artitgels legids il pli savens