Suenter la critica en la fasa da consultaziun desista il Cussegl federal da sia emprima proposta che avess tranter auter muntà pli bass tschains d'aua. La regenza ha plinavant decidì ch'il tschains d'aua maximal duai restar tuttina fin la fin dal 2024. Quai vul dir tar 110 francs per kilowatt. En la consultaziun da la stad 2017 aveva il Cussegl federal proponì al parlament da sbassar il tschains maximal sin 80 francs per kilowatt.
Sco proxim decida il parlament davart la proposta actuala dal Cussegl federal da laschar ils tschains d'aua sin il livel actual.
Chantuns e regiuns alpinas beneventan la decisiun
Tenor ina communicaziun da la conferenza da las regenzas dals chantuns alpins saja la decisiun confurma als fatgs e politicamain correcta. Pertge tenor in studi per incumbensa dals chantuns alpins hajan ils concerns d'energia era pudì far gudogn cun las ovras idraulicas durant la fasa dals pretschs bass. Plinavant sajan ils pretschs d'energia creschids dapi il 2016 per passa 25%. Er ch'ils lais da fermada cuntegnian actualmain pauc aua, mussia ch'ils concerns hajan pudì far bunas fatschentas l'enviern. Tut quai mussia ch'i na dettia naginas raschunas per sbassar ils tschains d'aua.
Ch'il cussegl federal vul limitar il tschains d'aua maximal fin l'onn 2024 n'è tenor la conferenza dals chantuns alpins però betg necessari. La finala veglia il Cussegl trametter en consultaziun in nov model per ils tschains d'aua l'atun 2018 u la primavaira 2019. Cun il nov model vegniss l'actual lura uschè u uschia remplazzà.
Er la Gruppa svizra per las regiuns da muntogna (SAB) beneventa la decisiun dal Cussegl federal. Tenor ella sto vegnir discutà en in emprim pass co reglar da nov il martgà d'electricitad e pir lura possian ins discurrer davart ils tschains d'aua. Sbassar ils tschains d'aua sco il Cussegl federal ha proponì la stad 2017 avess muntà tenor la SAB ina perdita da radund 150 milliuns francs per las vischnancas concessiunarias ed ils chantuns da muntogna.
RR novitads 14:00
Cuntrasts dals 21.03.2017
Legenda: Lai da Zervreila. KeystoneTschains d'aua – ina rendita fermamain periclitada
L'import da 550 milliuns è il pretsch che las ovras pajan a vischnancas e chantuns per duvrar l'aua e producir electricitad.
