I na vegn betg dad oz sin damaun pli char d'abitar a tschains, ma l'augment pudess capitar pass per pass durant ils proxims onns. E quai ch'è er da dir: Betg tut ils locataris e locatarias èn pertutgads tuttina ferm.
Tge è nov?
Questa gievgia è il tschains da referenza s'augmentà per l'emprima giada dapi il 2008 dad 1,25% sin 1,5%. Quai ha l'Uffizi federal d'abitaziuns communitgà. Il tschains da referenza è in impurtant factur per calcular ils tschains da locaziun per contracts existents.
Tge consequenzas ha l'augment sin 1,5%?
Sch'il tschains da referenza s'augmenta per in quart punct procentual, lura han locaturs il dretg d'auzar il tschains-chasa per 3%. Els dastgan però be auzar ils tschains che sa basan sin il tschains da referenza acutal dad 1,25%. Vul dir: Quels locaturs e quellas locaturas che han er sbassà il tschains ils ultims onns cura ch'il tschains da referenza è sa sbassà, quels e quellas dastgan uss er auzar il tschains-chasa.
Quantas chasadas èn pertutgadas?
En Svizra datti passa duas milliuns chasadas che vivan en abitaziuns a tschains. Bun la mesadad da quests contracts da locuziun sa basan sin il tschains da referenza actual. Pia pudessi esser che passa ina milliun chasadas stuessan pajar dapli tschains-chasa. Probablamain na vegnan però betg tut ils possessurs e possessuras da chasas ad augmentar il tschains.
Cura s'augmentan ils tschains?
In locatur ha mintgamai la pussaivladad d'augmentar il tschains-chasa sin il proxim termin da desditga. Ils blers contracts da locuziun pon vegnir desditgs mintga trais mais. Vul dir ch'ils blers tschains-chasa pon s'augmentar a partir dal prim d'october.
Quant ferm s'augmentan ils tschains-chasa entaifer in onn?
Igl è da quintar ch'il tschains da referenza s'augmenta vinavant. Probablamain gia il december sin 1,75%. Ensemen cun l'augment che l'Uffizi federal per abitaziuns ha communitgà questa gievgia, muntass quai che locaturs e locaturas avessan il dretg d'auzar il tschains-chasa per 6%. Plinavant pon els ed ellas argumentar cun la chareschia sco custs generals ch'èn creschids. Tut ensemen pudess quai manar ad in augment dal tschains-chasa da fin 10% durant in onn. Quai è però plitost in scenari extrem.
Quant ferm s'augmentan ils tschains-chasa a media vista?
Sch'ins va da quai anor che la chareschia resta auta ed ils tschains s'augmentan vinavant, lura pudessan ils tschains-chasa s'augmentar ils proxims onns per 10% fin 20%. Quai en cumparegliaziun cun il stan actual. I dat però er facturs che pon franar l'augment. P. ex. sch'i vegn bajegià bler ed i dat uschia concurrenza. Plinavant fiss in tal augment strusch supportabel per bleras chasadas, uschia ch'ils locaturs e locaturas na vegnan probablamain betg ad augmentar il tschains sin il maximal pussaivel.
Daco crescha il tschains da referenza?
Ils tschains creschan en general en Svizra. Uschia ha la Banca naziunala p. ex. augmentà il tschains directiv da -0,75% sin +1,5%. Quai ha gì per consequenza ch'ils tschains sin il martgà da chapital èn er s'augmentads. Ed uschia han las bancas augmentà ils tschains hipotecars e quai ha lura – cun in pau retard – in effect sin il tschains da referenza.
