Era il 2022 han ils organisaturs stritgà lur «cortège», il til dal tschaiver a Basilea. Sco quai ch'il comité d'organisaziun scriva, na vegnian ins betg da far in concept da protecziun ch'ins pudessia lubir tenor las pretensiuns da l'ordinaziun davart Covid.
Exposiziuns enstagl da til
Ins saja però vida tschertgar autras furmas per tuttina pudair festivar il tschaiver a Basilea. Sper l'uschenumnà «Gässle» ch'è in til nunorganisà fiss tenor il comité pussaivel da far in'exposiziun da laternas ed in'exposiziun da requisits e dals vehichels, enstagl dal til cun laternas e vehichels al tschaiver da Basilea che vala sco il pli grond tschaiver en Svizra.
Saira da salamuiras pli realistica ch'il til
Per la saira da salamuiras èn ils responsabels pli optimistics – en mintga cas per part. Là dependia quai da las mesiras vertentas. Per ils tschalers da las cliccas quintan ils organisaturs ch'i valian las medemas reglas sco per ils restaurants. Uschia ch'i fiss pussaivel da tuttina far las salamuiras cun certificat e tenor reglas.
La regenza da Basilea vul decider il schaner, en tge furma ch'il tschaiver pudessia avair lieu. Ins na sclauda betg ch'il «Gässle» fissia eventualmain pussaivel.