Ina mesemna damaun, las 9:39. In camiun beltg strivla la paraid dal tunnel e riva tras quai sin il vial oppost. Il camiunist tirc era probablamain alcoholisà. Sin il vial oppost vegn encunter ad el in auter camiun. A quel èsi reussì da franar, ma la collisiun era inevitabla. Tras la collisiun è schluppà in tanc da diesel, curt pli tard aveva ina strasarsa en in cabel envidà il diesel. Paucas minutas pli tard stevan ils dus camiuns en flommas. E perquai ch’in dals camiuns aveva chargià plirs tschients da pneus, sa sviluppava sper il fieu er in fim nunpenetrabel.
Cur ch’ils pumpiers eran arrivads, na pudevan els betg far bler. Ins ha decidì, da laschar arder ora il fieu, per avair in pli bun access en il tunnel. Suenter dus dis era il fieu stiz, ed ins veseva las consequenzas dal accident. Tar il lieu d’accident, l’uschenumnada zona cotschna, èn set vehichels ars ora cumplettamain e per part luads ensemen. 16 ulteriurs vehichels, tranter els divers camiuns e transporters, en vegnids demolids. Il plafond è cruda ensemen sur plirs meters ed ina gronda part dal tunnel era colurà nair dal fim.
En tut hai dà 11 morts, tranter els er il camiunist tirc, che ha chaschunà l’accident. El e nov autras persunas èn mortas d’ina tissientada da fim, l’autra persuna è arsa en las flommas.
Suenter l’accident, hai anc duvrà pli ch'ina emna, enfin ch’ins ha pudì rumir e sanar il tunnel. Motiv: Ins ha stuì spetgar enfin che l’aria en il tunnel era netta da particlas da russ e da gas da tissi.
La sanaziun ha durrà fin il december. Ils 21 da december è il tunnel vegnì dà liber per automobilists ed ils 22 da december per ils camiuns.