La banca svizra Credit Suisse CS procura dapi dis per lingias grassas pervi da las turbulenzas enturn la partenza dal top banker Iqbal Khan. Uss tira la banca consequenzas persunalas. Dus managers bandunian la banca per immediat, fa a savair l'agentura da novitads svizra SDA.
Tenor la banca haja in dals dus managers, Pierre-Olivier Bouée, ordinà da survegliar Iqbal Khan. Bouée haja concedì «dad avair agì tut sulet» scriva la banca en ses communiquè a las medias. Perquai surpiglia il manager la responsabladad ed sa retiria da ses post. Medemamain retratg sa haja il schef da segirezza.
L'observaziun da ses anteriur top banker Iqbal Khan era vegnì ordinà or da retschas da la CS, cura che Khan ha midà tar la banca concurrenta UBS. Uschia vulev‘ins chattar ora, sche Khan haja intimà illegalmain ad ulteriurs bankers da midar da la CS tar la concurrenta UBS.
Ni auters commembers da la Direcziun ni il Cussegl d’administraziun hajan savì da la surveglianza – hai num en la communicaziun da la banca.
RR novitads 10:00