Las plazzas da campadi svizras han nudà l'onn passà 4,2 milliuns pernottaziuns, in plus da 11% e quai malgrà ch'ellas han per part stuì serrar pervi da las mesiras da corona. En spezial ils mais fanadur fin october han ils campadis dumbrà in terz dapli pernottaziuns che durant la medema perioda dal 2019, quai resulta da las novas cifras da l'Uffizi federal da statistica.
Parahotellaria
L'entira parahotellaria svizra ha nudà il 2020 en total 14,8 milliuns pernottaziuns, in minus da radund 11%. La pli gronda reducziun han gì ils alloschis collectivs.
Sch'ins quinta dentant las cifras da la hotellaria e da la parahotellaria ensemen, han ins nudà il 2020 totalmain 38,5 milliuns pernottaziuns. Cumpareglià cun il 2019 è quai in minus da 31,5%.
Alloschis per gruppas
Il pli ferm pertutgà da las restricziuns pervi da corona èn stads ils alloschis per gruppas, sco per exempel ils albierts per la giuventetgna. Quels han nudà il 2020 in minus da 39,0%.
Bunas vistas er per il 2021
La parahotellaria è betg be vegnida davent il 2020 cun in egl blau, era las vistas per la stad 2021 èn empermettentas. Ils campadis dal TCS èn occupads fitg bain. Ed era Interhome u vitgs da Reka pon preschentar bunas cifras da reservaziuns. Las cudeschaziuns online per campadis da TCS èn s'augmentadas per 250%, cumpareglià cun l'onn avant. Interhome ha nudà in augment dad 85% e tar ils vitgs da Reka è quest augment tar 30%.
Ord l'archiv
Campadis durant il lockdown.
