Siglir tar il cuntegn

Header

Navigaziun

Viandants.
Legenda: Il Cussegl dals chantuns vul dar dapli daners per il turissem ed ha en consequenza decis d'augmentar il rom d'expensas per la promoziun economica. Keystone
cuntegn

Turissem Cussegl dals chantuns vul dapli daners

Il Cussegl dals chantuns ha decidì d'augmentar il rom d'expensas per la promoziun economica per ils proxims quatter onns per 30 milliuns sin passa 390 milliuns francs. Cun 33 cunter 9 vuschs suonda la chombra pitschna a la cumissiun per economia e per taxas.

Il Cussegl dals chantuns è cunquai pli generus envers il turissem ch'il Cussegl naziunal. Ils Cussegl dals chantuns ha discutà davart la promoziun da la plazza Svizra per ils onns 2020 enfin il 2023. La gronda part da quest pachet va al turissem. Quel vul il Cussegl dals chantuns augmentar per 10 milliuns – da 220,5 sin 230 milliuns francs.

Divers avis

Il turissem saja da grond'impurtanza, cunzunt per las regiuns da muntogna ha argumentà Pirmin Bischof da la PCD. Sustegn ha el survegnì dal socialdemocrat Hans Stöckli. I saja ussa impurtant da motivar ils indigens da far vacanzas en Svizra, quai era per raschuns ecologicas.

D'auter avis è Peter Föhn da la PPS. I dettia era autras branschas che pateschian e che dumondian sustegn. Ins stoppia perquai esser precaut cun dar ora dapli daners. Vulì savair nagut da dapli daners per il turissem ha era la socialdemocrata Anita Fetz. En tschertas regiuns dettia memia blers turists, en autras memia paucs. Avant ch'i dettia dapli daners stoppia Svizra Turissem preschentar ina strategia co far frunt a quest dischequiliber.

Enavos en il Cussegl naziunal

Il Cussegl naziunal era restà tar la proposta dal Cussegl federal e sto uss puspè sa fatschentar cun il tema.

RR novitads 12:00