Concret èn quai stadas 16,7 milliuns pernottaziuns. Quai mussan las cifras da l’Uffizi federal da statistica. Bundant dus terzs da las pernottaziuns (68,6%) han cudeschà persunas che vivan en Svizra. Las pernottaziuns dals Svizzers èn s'augmentadas per 2,4% sin 11,4 milliuns. Ils giasts esters da lur vart han cudeschà l’onn passà 2,8% damain pernottaziuns cumpareglià cun il 2018.
Augment sin campings
En la parahotellaria han las abitaziuns da vacanzas commerzialas nudà la pli gronda cumpart. Ellas han nudà radund 44% da las pernottaziuns. Ma il dumber è qua sa reducì per 3,6% cumpareglià cun il 2018, sin 7,3 milliuns pernottaziuns. Sa reducì il pli ferm è la cumpart dals Svizzers e las Svizras, numnadamain per 7,1%. Tar ils visitaders da l'ester è il dumber sa reducì per 1,1%.
En albierts per la giuventetgna è il dumber da pernottaziuns dentant s'augmentà per 4% sin 4,6 milliuns. Sin plazzas da campadi è il dumber creschì perfin per 5% sin 3,8 milliuns pernottaziuns. Qua è il dumber da Svizzers creschì in zic pli ferm (+5,7%) ch'il dumber da persunas estras (+3,4%).
Per quest onn vegn spetgà deficit
Dumbers da pernottaziuns tar il svilup da quest onn, n'ha l'Uffizi federal per statistica anc betg publitgà per la parahotellaria. I vegn dentant spetgà in deficit. Er albierts per la giuventetgna e campadis èn stads serrads durant emnas pervi da la crisa da corona.
Almain vegn spetgada ina buna stad. Quai mussian las reservaziuns per ils campadis per questa stad. Fin mez avust sajan ils campadis dal TCS, il pli grond gestiunari da campadis, per gronda part occupads ora.
