Per la stad 2017 quinta il post da conjunctura KOF da l'ETH Turitg che las pernottaziuns da giasts da l'exteriur pudessan s'augmentar durant la stagiun da stad per 2,1%. Quai cunzunt grazia al martgà asiatic e nordamerican. Plinavant quinta il KOF cun in augment da 1% tar ils giasts indigens.
Stagiun d'enviern 2016/2017
Pervi da la nausch’aura saja la stagiun d’enviern passada stada ina sfida per il turissem svizzer, suttastritga il post en sia prognosa. Il KOF schazegia che las pernottaziuns sajan s’augmentadas l’enviern per 0,6% cumpareglià cun la medema perioda da l’onn avant.
Prognosas per ils proxims onns
Per ils proxims dus onns mussia il svilup dal turissem ensi – quai er per las regiuns muntagnardas. Damai ch’i dettia puspè dapli giasts da l’exteriur, ma er indigens, è il KOF optimistic per ils proxims dus onns. Las regiuns muntagnardas vegnian a magunar ils davos onns ch’èn stads difficils.
Mintga dus onns publitgescha il KOF ina prognosa per il svilup dal turissem svizzer. Quai mintgamai sin incumbensa dal Secretariat da stadi per l'economia SECO.
RR novitads 12:00
