L'augment saja però main ferm ch'anc avant in onn, communitgescha l'institut da perscrutaziun Bakbasel.
Cun l'aboliziun dal curs minimal da l'euro èn vacanzas en Svizra vegnidas marcantamain pli charas per turists da l'exteriur. Il turissem en las citads n'ha però betg reagì uschè ferm sco quel en las regiuns da muntogna.
Genevra sin plazza 7 – meglier resultat svizzer
Ina cumparaziun cun 10 ulteriuras citads europeicas relativescha las bunas cifras. Questas citads han numnadamain nudà ina dumonda marcantamain pli auta (plus 4,6%). Internaziunalmain sin plazza 1 sa chatta sco l’onn passà Barcelona, avant Firenza e Prag. I suondan Minca, Vienna e Salzburg.
Sin plazza 7 sa chatta Genevra, ch’è dapi il 2010 la citad svizra cun il pli grond success. Turitg sco segundmeglra destinaziun urbana en Svizra ranghescha sin plazza 9. A la fin dal ranking sa chattan sco l’onn passà Berna, Basilea e Losanna.
Damain giasts da l’Europa, dapli da l’Asia e da l’America dal Nord
Il dumber da pernottaziuns da giasts svizzers è creschì per 3,2%, quel da giasts da l’exteriur per 1,9%. La dumonda da giasts da l’Europa dal Vest munta a minus 125’000, quella da l’Europa da l’Ost minus 84’000.
Quests minus èn dentant vegnids cumpensads cun pli auts dumbers da pernottaziuns da giasts da l’Asia (plus stgars 170’000) e da l’America dal Nord (plus 60’000).
RR novitads 15:00