Il mustgin-tigher asiatic è entant er arrivà a Turitg. A Wollishofen han ins chattà l'animal, larvas ed ovs. Las abitantas ed ils abitants èn gia vegnids infurmads davart il nov vischin. La citad punctuescha però ch'i na dettia il mument nagina raschun da far quitads. Tgi che vegn furà en Svizra d’in tal mustgin, na stoppia betg temair ed i na fetschia betg da basegn dad ir tar il medi.
Gia avant 3 onns avevan ins chattà ovs tar in parcadi da bus al Sihlquai. Lura gievi per exemplars importads che tatgavan vid ils vehichels. Ils mustgins ch'ins ha ussa chattà a Wollishofen han però probabel survivì ils mais d'enviern a Turitg.
Mustgin-tigher er en il Grischun
Mesiraziuns en il Grischun or dal onn 2017 han mussà, ch'ils mustgins asiatics èn gia sa chasads fix en il chantun.
Ils ultims onns è il dumber schizunt creschì. L’onn passà è danovamain vegnì registrà in augment en il sid dal Mesauc. Plinavant han ins er constatà per l’emprima giada singuls mustgins en Bregaglia, a Brusio e Cuira. En connex cun ils resultats aveva il chantun annunzià mesiras per cumbatter la derasaziun dal animal. Quai cunzunt en las regiuns pertutgadas, tranter auter cun infurmar meglier la populaziun.
Dapli infurmaziuns tar l'animal
RR novitads 17:00