Deplorablamain na dettia nagina pussaivladad da spendrar l'interpresa en sia furma actuala, scriva la successura da Charles Vögele en ina communicaziun a ses collavuraturs. Dapi l'entschatta zercladur ha Sempione Fashion, ch'è responsabla per las butias dad OVS en Svizra, problems finanzials.
Er in proceder da consultaziun cun ils partenaris socials era vegnì instradà. La direcziun dad OVS refusa dentant ina prolungaziun, ha scrit il sindicat Unia avant in'emna. Ils collavuraturs hajan fatg propostas e pretendì urgentamain in plan social da la direcziun.
Discurs cun interessents potenzials
En la communicaziun interna scriva Sempione Fashion ch'il management aspireschia da chattar, sche adina pussaivel, ina schliaziun per il persunal. La direcziun mainia divers discurs cun interessents potenzials. Plinavant hajan blers detaglists svizzers annunzià interess vid il persunal qualifitgà.
RR novitads 09:00