Siglir tar il cuntegn

Header

cuntegn

Svizra Tuttina interrut la tschertga durant la notg

L’armada svizra ha il mument interrut la tschertga suenter il pilot da l’aviun F/A 18 curda. Pervi da l’aura ed il privel da lavinas saja la tschertga memia privlusa, ha communitgà il Departament federal da defensiun.

  • La tschertga dal pilot da la F/A-18 è vegnida interrutta pervi da la trid'aura ed il privel da lavinas.
  • Restanzas da l'aviun aveva l'armada chattà enturn mardi mezdi.
  • Ils signals dals emetturs d'urgenza èn stads memia curts per localisar ubain identifitgar els.

Curt avant avevan ils responsabels anc communitgà che la tschertga vegnia era cuntinuada la notg. Sco quai ch'il Departament da defensiun communitgescha saja la tschertga difficila. Ella vegnia uss interrutta pervi da la trid'aura ed il privel da lavinas. En acziun èn spezialists da muntogna da l'armada. Ulteriurs spezialists sajan pronts da vegnir sgulads al lieu.

Sper l'armada sajan en acziun era la Rega, helicopters da las polizias chantunalas da Turitg e Berna. Anc adina vala il scumond da sgular per la regiun enturn il pass dal Susten.

Suenter avair sursgulà il lieu ha descrit mardi suentermezdi il schef dal corp dals pilots professiunals, Felix Stoffel, il lieu sco foppa profunda cun spundas da glatschers stippas. Là hajan ins constatà in surfatscha naira sin il grip, pauc sut la cresta, e pitschna tocca da l'aviun; quai datiers dal «Hinter-Tierberg» sin radund 3000 meters sur mar.

purtret felix stoffel
Legenda: Il schef dal corp dals pilots professiunals, Felix Stoffel, ha sursgulà il lieu da la crudada. SRF

Per tals cas datti emetturs d'urgenza. Tenor l'armada dettia quai en quest cas 3 emetturs:

  • vi da l'aviun
  • vi dal sez catapultabel
  • vi dal pilot

Ins haja bain registrà tals signals il glindesdi. Ils signals sajan però stads memia curts per als localisar ubain insumma identifitgar, sch'i vegnian da quest aviun, ha ditg il schef dal corp da pilots professiunals, Felix Stoffel.

Tschertga cun impediments

Suenter che la tschertga ord l'aria n'è betg stada pussaivla glindesdi saira, han il mardi trais helicopters pudì continuar la tschertga ord l'aria. Els han uschia localisà il lieu da la crudada curt suenter mezdi.

Tuttenina sparì

Glindesdi a las 16:05 aveva l'armada pers il contact cun il pilot e n'aveva era nagins signals da l'aviun F/A-18 ch'eran en la regiun dal Susten. Tar la mala vista tras l'aura n'aveva l'armada betg pudì lantschar tschertgas ord l'aria; colonnas da tschertga a pe eran en funcziun en la regiun dal Susten.

aldo c. schellenberg
Legenda: Commuventà sto il cumandant da l'aviatica svizra Aldo C. Schellenberg communitgar ch'ins n'haja anc betg chattà il pilot e l'aviun. SRF

Aura betg extraordinaria per in manever

Tar il manever previs saja la situaziun meteorologica bain stada uschia ch'ils pilots sajan sgulads tenor instruments. Però betg extraordinaria per sgular manevers.

Indicaziuns pli concretas dal pilot na dattan ils responsabels betg. Mo tant ch'ils geniturs dal pilot sajan en la tgira dal departament. «Nus sperain ed urain per il pilot», ha ditg il cumandant Schellenberg.

RR novitads 18:00+++

Artitgels legids il pli savens