L'Autoritad independenta da recurs davart radio e televisiun AIRR (per tudestg UBI) ha tractà il venderdi il recurs intoltrà encunter l'emissiun «Profil» da Radiotelevisiun Svizra Rumantscha RTR. Recurrì vegn concret cunter l'emissiun «Profil» cun Urs Cadruvi ch'aveva chaschunà discussiuns e lingias grassas en las medias rumantschas. L'emissiun saja stada adequata.
Il gremi ha constatà che l’emissiun n’haja ni violà las reglas da maniera e respect envers il giast, ni sia sfera privata. Ella na saja era betg stada unilaterala ubain manipulativa sco reclamà. La AIRR crititgescha da betg avair annunzià al public il focus critic da quest Profil, communitgescha la AIRR. Il public haja però adina pudì far si'atgna opiniun.
Il president da la AIRR Vincent Augustin, medemamain represchentant da la Svizra Rumantscha en la cumissiun, haja en questa dumonda prendì recusaziun, è pia s'abstegnì da la vusch.
RTR reagescha cun satisfacziun
Il verdict unanim da l’AIRR a reguard la lavur schurnalistica en questa emissiun saja ina satisfacziun per RTR, di il producent responsabel Guadench Dazzi.
Nus essan satifatgs dal verdict da l’AIRR. Retrospectiv essan nus da l’avis ch'igl avess servì al public da savair gia l'entschatta da l'emissiun, daco che nus avain elegì ina furma schurnalistica pli confruntativa.
