La gronda part da las reservas vegnia fatga en connex cun credits ipotecars marschs en ils Stadis Unids.
Da curt avevan las medias americanas rapportà che las autoritads dals Stadis Unids stettian curt avant ina cunvegnientscha cun differentas bancas grondas. Latiers giaja quai per intgins 100 milliuns enfin a 3 milliardas per banca.
UBS cun gudogn dad 1,2 milliardas francs
La banca UBS ha pudì augmentar marcantamain ses gudogn il segund quartal da quest onn. Il gudogn net dad 1,2 milliardas francs munta in augment per 53 %, cumpareglià cun il segund quartal dal 2014.
Procurà per il bun resultat da l’UBS han cunzunt las fatschentas cun l'administraziun da la facultad. Analists n'avevan betg spetgà in tal augment dal gudogn.
Per il futur sa mussa la banca precauta. Effects stagiunals pudessan influenzar ils retgavs e gudogns il terz quartal. Plinavant restian blers problems geopolitics.
Esser pinà per temps pli turbulents
L'UBS prenda in'ulteriura mesira per esser pinada sin la proxima crisa. Ella stgaffescha ina societad affiliada che duai garantir l'abilitad d'agir operativ en in cas da crisa. Ils proxims onns duain las funcziuns da servetschs e da support per l'entir concern daventar independentas, scriva la UBS.
Da quest pass na spetga la banca betg mo meglras pussaivladads d'agir en temps turbulents, mabain era pretensiuns da chapital pli bassas da las autoritads regulatoricas.
RR novitads 07:00 / 11:00 / 28.07.2015, 12:00