La prontadad da gidar l'Ucraina è gronda. Persunas ed organisaziuns privatas han donà 380 milliuns francs dapi l'entschatta da la guerra. Quai rapporta Zewo, l'organisaziun che certifitgescha ovras d'agid en Svizra. Ina tala summa saja in record.
Sulettamain la Chadaina da Fortuna haja rimnà 130 milliuns francs. Er gliez è stà bunamain in record per l'organisaziun. Mo tar il tsunami en l'Asia dal Sidost ha ella anc rimnà dapli daners.
Cunquai surpassa l'agid da privatas e privats, d'interpresas e da fundaziuns l'agid da la Confederaziun. Quella ha fin uss pajà 270 milliuns agid directamain a l'Ucraina, u indirectamain sur organisaziuns internaziunalas sco l'ONU.
