Il president da la Confederaziun partent, Ueli Maurer ha accentuà durant la conferenza da medias per la fin da l'onn ses viadis ch'el ha fatg en l'exteriur.
Quasi tut las visitas han gì la finamira da chattar alliads per il project da refurma da taglia da l'OECD.
«Nus avain uss pudì construir ina rait che lubescha a nus da pigliar influenza sin quest tema», ha bilantschà Maurer. El saja s'inscuntra cun mintga minister da finanzas da l'Europa e quai almain ina fin tschintg giadas. I dovria dentant ulteriurs sforzs per vegnir tar ina schliaziun raschunaivla.
Ueli Maurer schazegia che la Svizra perdiss uschia 0,5 fin 5 milliardas francs, eventualmain er dapli. Maurer ha er fatg ses viadis en connex cun la glista grischa da l'UE per oasas da taglia. Sin quella era la Svizra pervi dals privilegis da taglia per firmas da l'exteriur. Suenter il Gea dal pievel svizzer a la refurma da taglia ed AVS dals 19 da matg e dapi che la lescha è en vigur, n'è la Svizra betg pli sin questa glista.
Fitg buna legislatura
Maurer ha numnà la legislatura passada «fitg buna». I saja gartegià da serrar giu projects a lunga vista en pliras spartas. Sco exempel ha Maurer numnà la gulivaziun da finanzas naziunala ed il barat da datas cun entant enturn 100 stadis.
Per avair success dovria la Svizra ina buna rait internaziunala ed ella stoppia esser abla da reagir svelt.
RTR novitads 15:00