Svizra - Ueli Maurer vul dapli persunal per garantir la segirtad publica
Il Cusseglier federal e minister da defensiun Ueli Maurer vesa in basegn d’agir per la Svizra suenter ils attentats a Paris. Perquai vul el dapli persunal per il servetsch d'infurmaziun e per la guardia da cunfin.
Las autoritads da segirezza en Svizra hajan reagì immediat ed en vista als meds existents bain sin las attatgas, uschia Maurer.
Da far ponderaziuns saja era davart ina truppa da polizia speziala, ha el ditg a Radio SRF. A la Svizra manchia in detaschament spezial per cumbatter il terror. Tuttina: Tenor Maurer na dettia quai nagina segirezza da 100%.
