Siglir tar il cuntegn

Header

cuntegn

Uffants ed impediment 5% dals uffants han in impediment – 1% in impediment grev

54'000 uffants en Svizra vivan cun in impediment, mintga tschintgavel da quels è fermamain restrenschì. Quai resulta ord las cifras che l'Uffizi federal da statistica ha rimnà en connex cun il di internaziunal per persunas cun impediment ch'è ils 3 da december. Las cifras sa basan sin l'onn 2017.

Dals uffants tranter 0 e 14 onns vivevan il 2017 circa 5%, ni en cifras 54'000 uffants cun in impediment. La probabilitad d'in impediment prendia tiers il decurs da l'uffanza, constatescha l'Uffizi federal per statistica. Plinavant sajan buobs periclitads pli savens. 60-66% dals uffants impedids sajan buobs.
Bunamain la mesadad dals impediments, numnadamain 43% sajan handicaps corporals, quels hajan savens mo in pign effect sin il mintgadi dals uffants. Cun 16% datti bain in toc pli paucs impediments spiertals, quels hajan dentant ina pli grond'influenza en il mintgadi. Mintga segund impediment spiertal vegn taxà sco impediment grev.

1% dals uffants impedids grevamain

1'622 uffants han vivì il 2017 per part u l'entir onn en ina chasa speziala perquai ch'els pateschan d'in impediment grev, respectivamain perquai che las resursas en famiglia na tanschan betg per tgirar l'uffant a chasa. Tut en tut vivia radund 1% dals uffants cun in impediment grev. La fin dal 2017 vivevan en Svizra radund 1,3 milliuns uffants tranter 0 e 14 onns.

Ord l'archiv

Sulet en il Grischun prestan persunas che tgiran lur confamigliars lavur betg pajada en valita da 65 milliuns francs, e quai mintg'onn. Tge sforzs che la tgira permanenta munta per confamigliars tracta la suandanta contribuziun.

Video
Di dals parents che tgiran
Or da Telesguard dals 30.10.2019.
laschar ir

RTR novitads 12:00