Il «Grond Premi da litteratura», il pli aut premi litterar da la Svizra, va quest onn al scrivent Klaus Merz per sia ovra da vita. Quella cumpiglia tant lirica sco er prosa, tocs da teater, gieus auditivs ed essays. Sias ovras sajan enconuschenta sur cunfins. Quai ha communitgà l’Uffizi federal da cultura. Merz ha 78 onns e viva en il chantun Argovia.
«Il sguard en il dadens ed ina lingua concentrada» sajan marcants tar las ovras da Klaus Merz, uschia la giuria. Cun el vegnia undrada «ina vusch da bassa, dentant er insistenta e cun paisa».
Enconuschent internaziunal
Klaus Merz è fitg renumnà en la scena da litteratura. Uschia ha el gia gudagnà il premi da litteratura da Hermann Hesse ubain il premi Gottfried Keller. Sias ovras èn vegnidas translatadas per exempel per englais, franzos e talian, dentant er per russ u persian.
Il premi è dotà cun 40'000 francs. La surdada uffiziala è ils 10 da matg en il rom dals Dis da litteratura da Soloturn. Il premi spezial per translaziun va a l'autura da Turitg, Dorothea Trottenberg. Plinavant han tschintg ulteriuras auturas ed auturs survegnì in premi da l'Uffizi federal da cultura.
Or da l'archiv
Avant in onn ha l'autura rumantscha Leta Semadeni survegnì il Grand Prix da literatura.