Duas da trais persunas sur 15 onns en Svizra pledan regularmain dapli ch'ina lingua. Uschia è la cumpart da persunas plurilinguas creschida levet il 2019. Quai en congual cun l'ultima retschertga davart lingua, religiun e cultura da l'Uffizi federal da statistica da l'onn 2014.
Englais è la lingua betg naziunala la pli derasada en Svizra. Ella vegn er emprendida il pli savens.
Il Rumantsch en Svizra
Per 0,5% da la populaziun è il rumantsch la lingua principala. Quai èn var 36'500 persunas. 0,9% da tut la populaziun dovra ella regularmain. Quai tenor cifras da l'onn 2019. Trais quarts da las Rumantschas e Rumantschs vivan en Grischun, var 10% a Turitg.
Bunamain tuts che discurran regularmain rumantsch, discurran er tudestg u tudestg svizzer. 40% dals rumantschs discurran regularmain englais. Pir lura suondan talian (28%) u franzos (20%). 60% da las persunas dumandadas vulan, ch'il rumantsch vegn promovì dapli.
In terz dals uffants èn «bilings»
Tenor la retschertga da l'Uffizi federal da statistica, vegnan 33% dals uffants sut 15 en contact cun duas linguas. 10% creschan perfin si cun trais u dapli linguas.
En general vala la regla: pli vegl ch'ins è – e pli probabel ch'igl è ch'ins dovra mo pli ina lingua. 64% da las persunas sur 75 onns dovran mo pli ina lingua.
