Siglir tar il cuntegn

Header

cuntegn

Svizra Ulteriura unfrenda

In uffant da scola è mort en l'ospital en consequenza da las grevas blessuras. Gia ier è vegnì enconuschent ch'i sa tracta dals morts da requirents d'asil. Commembers da duas famiglias da l'Eritrea e da l'Etiopia sajan mortas en las flommas, quai ha communitgà la polizia chantunala da Soloturn.

  • in uffant da scola è mort en consequenza da las blessuras.
  • Tar ils ulteriurs morts sa tractia da 4 creschids da 27 fin 33 onns, d'in pop e d'in uffant da scola.
  • Ina cigaretta fimada en letg saja la raschun per l'incendi.
  • 2 uffants èn anc en l'ospital, in è grevamain blessà
  • Per tut ils abitants da la chasa è vegnì organisà in nov suttetg.
  • Ina persuna è vegnida arrestada provisoricamain.

Il fieu era rut or suenter las dus la notg

Curt suenter las duas da la notg sin glindesdi era il fieu vegnì remartgà. En la chasa sa chattavan passa 20 persunas. Las bleras sajan vegnidas transportadas cun agid dals pumpiers ord chasa. Per sis persunas è dentant l'agid vegnì memia tard. Tranter ellas èn er uffants, sco quai che la Polizia chantunala da Soloturn communitgescha gia l'avantmezdi.

Durant las lavurs da stizzar han ils pumpiers er evacuà la chasa vischina. Ils abitants da quella chasa han dentant gia durant la notg puspè pudì turnar en lur dachasa.

Cigaretta fimada a letg

En il curs dal di era sa concretisà il suspect da la Polizia chantunala, ch'il fieu saja rut or en las auzadas sut e saja sa derasà da là en tut la chasa da pliras famiglias. Sco raschun per l'incendi vala actualmain ina cigaretta fimada en letg – u cità tenor la communicaziun da la polizia il «diever faus da products da fimar».

Las investigaziuns cuntinueschian dentant, scriva la Polizia chantunala da Soloturn en sia communicaziun a las medias.

RR novitads 07:30

Artitgels legids il pli savens