La Svizra ha decidì ulteriuras sancziuns cunter la Russia. Da nov vala in scumond da cumprar, importar u transportar aur e products d'aur or da la Russia. Era scumandà è da porscher servetschs en connex cun tala rauba.
Il Cussegl federal realisescha cunquai ina part da las sancziuns che l'Uniun europeica aveva decidì ils 21 da fanadur. Las mesiras van en vigur las 18:00, sco il Departament federal d'economia scriva. Fin uss era sulet scumandà d'exportar aur en la Russia.